Nga Tirana, ku po zhvillohet Samiti i Komunitetit Politik Europian, Presidentja e Komisionit Europian Ursula von der Leyen deklaroi se Bashkimi Europian do të shtojë presionin ndaj Kremlinit për ta detyruar presidentin rus Vladimir Putin të pranojë një zgjidhje paqësore në Ukrainë.
Duke folur për gazetarët, von der Leyen theksoi se është bërë e qartë se Putini nuk ka asnjë interes të vërtetë për paqe.
Ajo njoftoi se Brukseli po përgatit një paketë të re sanksionesh që do të godasë sektorin financiar rus dhe infrastrukturat energjetike strategjike si Nord Stream 1 dhe 2.
“Putin kërkoi një armëpushim më 9 maj, por vetë nuk e respektoi kurrë. Ukraina, përkundrazi, kërkoi një armëpushim të mbështetur nga SHBA dhe BE, që u refuzua nga Moska. Më pas, vetë Putini propozoi një takim në Turqi me Zelenskyn, i cili pranoi, por Putin nuk u paraqit kurrë,” deklaroi Von der Leyen.
Sipas saj, përballë kësaj sjelljeje të vazhdueshme refuzuese dhe të papërgjegjshme nga ana e Moskës, BE do të ulë tavanin e çmimit të naftës ruse dhe do të zgjerojë sanksionet në fusha të tjera ekonomike, me synimin për të rritur izolimin financiar dhe politik të Rusisë.
“Ne kërkojmë paqe, por ajo nuk vjen duke heshtur. Duhet presion i vazhdueshëm. Dhe këtë do të bëjmë,” përfundoi Presidentja e Komisionit Europian.
