Raportuesja për Kosovën në Parlamentin Europian, Viola von Cramon ka vizituar Prishtinën ka folur edhe për mediat në lidhje me çështjet që janë aktuale për vendin.
Ajo ka kërkuar zotimin e qeverisë për gatishmëri në dialogun me Serbinë dhe propozimet e reja janë mirë për audiencën e brendshme, duke marrë parasysh edhe marrëveshjet ekzistuese.
“Ne duhet të kemi zotimin nga kjo qeveri se ata janë të gatshëm për këtë dialog dhe se do të punojmë mbi marrëveshjet ekzistuese, asgjë tjetër nuk ka rëndësi. Nëse dikush vjen me propozime të reja është shumë mirë edhe për audiencën e brendshme, është mirë për idetë e reja, por natyrisht nuk mund të jeni kundër marrëveshjeve ekzistuese”, u shpreh Von Cramon.
Von Cramon është pyetur edhe për marrëveshjen e Uashingtonit dhe ka thënë se është e sigurt se administrate e Biden nuk do të insistojë në të.
“Nuk jam e sigurt se BE-ja ka qenë plotësisht në pajtueshmëri me këtë, apo e ka përkrah. Unë jam për dialogun e lehtësuar nga BE-ja dhe administrata e re Biden është me rëndësi që të harmonizohet edhe me të dërguarin e veçantë zotëri Palmer lidhur me harmonizimin e raporteve të Uashingtonit dhe BE-së për çështjen e dialogut. Nuk jam shumë e sigurt se administrata e ShBA-së vetvetiu do të insistonte në marrëveshjen e Uashingtonit. Kjo është çka mund të them për momentin, të presim dhe të shohim”, tha raportuesja në PE.
Ndër të tjera, Von Cramon ka kritikuar edhe qëndrimin e Francës për liberalizimin e vizave për Kosovën. Ajo tha se Kosova i ka përmbushur kushtet teknike dhe është gabim që po bëhet për rajonin dhe BE-në vendimi për të mos i hequr vizat.
“Shpresoj që në një moment do të shohim qëndrime më pak të polarizuar dhe mjedis politik më të përshtatshëm në Francë. Unë kam shpresuar që gjatë presidencës së Gjermanisë në BE vitin e kaluar kemi mundur ta kemi këtë temë në agjende derisa të gjithë e dimë që Kosova i ka përmbushur kushtet teknike edhe komisioni dhe shtetet e tjera do të dëshironin që të marrin dritën e gjelbër për liberalizim të vizave. Në fund të fundit është çështje e Këshillit të Evropës dhe në këtë pikëpamje ka disa anëtar të këshillit që janë ende skeptikë dhe hezitojnë. Siç keni mundur ta shihni nga vizita e kryeministrit në Francë, nga qeveria franceze nuk morën premtime që kjo do të ndodhte. Më vjen keq për këtë, dhe është për keqardhje dhe mendoj që është një gabim që po bëhet për regjionin dhe për Bashkimin Evropian”, ka thënë Von Cramon.
