Në orët në vijim, qyteti i Vlorës pritet të përfshihet nga reshjet e shiut me intensitet të lartë. Për këtë arsye, Bashkia e Vlorës ka bërë një apel të fortë për kujdes, duke u kërkuar qytetarëve që të shmangin parkimin e automjeteve në zonat më të rrezikuara nga përmbytjet ose akumulimi i ujit.
Në një njoftim në rrjetet sociale, Bashkia u kërkon qytetarëve të jenë të vëmendshëm dhe të ndjekin rekomandimet për të shmangur rrezikun që mund të sjellin këto kushte atmosferike.
Po ashtu, Bashkia njofton se grupet e Ujësjellës Kanalizimeve, si dhe ekipet e emergjencave të bashkisë, do të jenë të pranishme në terren për të monitoruar situatën dhe për të ndërhyrë nëse do të jetë e nevojshme.
Autoritetet lokale janë të angazhuara për të menaxhuar çdo situatë që mund të lindë nga reshjet e shiut dhe për të garantuar sigurinë e qytetarëve. Pastrimi dhe mbikëqyrja e sistemeve të kanalizimeve do të jetë një prioritet gjatë kësaj periudhe të reshjeve të dendura.
