Ka ardhur reagimi i parë nga Partia Socialiste për fitoren e Albin Kurtit në zgjedhjet e së dielës në Kosovë. Ka qenë Taulant Balla ai që ka shprehur urimin e parë për Vetëvendosjen, duke thënë se dy vendet tona janë “motër e vëlla” dhe mësojnë nga njëri-tjetri. Balla ka përgëzuar partitë në Kosovë për standardin zgjedhor. Shpresojmë që partia e Ballës dhe partitë e tjera në Shqipëri t’i reflektojnë këto leksione demokracie që erdhën nga Kosova në zgjedhjet e 25 prillit. Balla ka thënë se rezultati duhet pranuar dhe uron që një gjë e tillë të ndodhë edhe me zgjedhjet në vendin tonë. Në fakt, rezultati në Kosovë është më se i pranueshëm pasi Vetëvendosje nuk akuzohet për vjedhje votash dhe lidhje me krimin dhe e njëjta gjë nuk mund të thuhet për Partinë Socialiste të Shqipërisë.
“Dua ta nis me një urim për Kosovën për mbajtjen e zgjedhjeve me një standard të larta, për një pjesëmarrje të admirueshme në zgjedhje. Kemi diskutuar në mbledhjen e Shtabit, mbi zgjedhjet në Kosovë. Konstatojmë me kënaqësi që këto zgjedhje vajtën shumë mirë. Gjej rastin që të përgëzojë të gjitha partitë politike të Kosovës për frymën dhe standardin e zgjedhjeve. Dua ta uroj me gjithë zemër Vetëvendosjen, mikun tonë Albin Kurtin për fitoren e këtyre zgjedhjeve. Uroj që krijimi i qeverisë së re të marrin kohën e mjaftueshme. Mezi presim bashkëpunim. Ne jemi motër e vëlla dhe sigurisht që marrim nga njëri-tjetri mësime, eksperienca. Ajo që për mua është me rëndësi dhe që mesazhi që duhet të japim është se tashmë partitë politike të pranojnë rezultatin. Uroj që dhe në Shqipëri pas 25 prill çdo parti politike të pranojë rezultatin. Është me rëndësi që të hiqet dorë nga historitë e së të kaluarës, nga bojkotet. Ata që humbin zgjedhjet duhet të kuptojnë se nuk është faji i qytetarëve. Kur populli merr pjesë masivisht, edhe pse ishte pandemia, mesazhi ishte i qartë.”, ka thënë Balla.
