Para dy ditësh një krim i dyfishtë ndodhi në Fier, ku 61-vjeçari Xhevair Hoxha vrau me thikë Merushe Hazizin, bashkëjetuesen e djalit dhe më pas veten, duke u varur në një pemë pas banesës së tij.
Gazetarja Klodiana Lala në emisionin “Opinion” ka treguar detaje të reja rreth ngjarjes së rëndë.
Lala u shpreh se kanë patur një debat paraprak dhe ka dyshime se autori i vetëvarur e ka rrahur partneren e djalit, e cila kishte një muaj që kishte mbërritur në shtëpinë e partnerit të saj.
Sipas gazetares investigative, fakti që personat perreth nuk kanë ndërhyrë edhe pse I kanë dëgjuar britmat e 30-vjeçares, është skandaloz.
“Autori i dyshuar i ngjarjes ka patur një debat, e ka dhunuar partneren e djalit, skandalozja dhe e tmerrshmja në këtë histori është që askush rreth e rrotull edhe pse i kanë dëgjuar të bërtiturat e vajzës së re, nënës së tre fëmijëve nuk bënë asgjë për ta ndaluar. Në shtëpi kishin një muaj që jetonin bashkë, por një vit që njiheshin e frekuentoheshin me njëri-tjetrin. Por gjatë gjithë kësaj kohe autori i dyshuar që u vetëvar, nuk e ka pranuar.”
Sipas të dhënave nga fqinjët një nga arsyet e mospranimit nga vjehrri dhe i gjithë fshati pretendohet të jetë fakti që vajza mirëmbante veten, mbante thonj të gjatë, kujdesej për veten, lyhej me buzëkuq… duke çuar kështu në fakte tronditëse. Lala thekson se në Shqipëri ende nuk pranohet si normalitet një marrëdhënie mes dy personave.
“Në Shqipëri Fevzi nuk pranohet si një normalitet një marrëdhënie mes dy personave. Ajo ishte në proces divorci, kishte lënë tre fëmijë të cilët i kishte lënë me ish-bashkëshortin edhe pse nuk ishte finalizuar divorci. Nuk di arsyet pse janë ndarë, por cilatdo qofshin arsyet, ajo ishte një grua e lirë dhe mund të kishte një marrëdhënie normale. Problem është se i gjithë fshati ishte kundër një vajze 30-vjeçare sepse mendonin se nuk ishte si të gjithë vajzat e tjera rreth e rrotull”
