Ministrja e Arsimit Rinisë dhe Sporteve, Evis Kushi me anë të një postimi në rrjetet sociale iu ka bërë thirrje çdo mësuese, pedagogu dhe studenti që të marrin vaksinën anti-COVID, në këtë muaj të hapur të vaksinimit.
Kushi shprehet se kjo është mënyra më e mirë që të kemi një vit shkollor dhe akademik të suksesshëm dhe të mbarë.
“Në këtë muaj të hapur vaksinimi për të gjitha grupmoshat +18 vjeç, inkurajoj çdo mësues, pedagog dhe student që nuk është vaksinuar deri më tani, të kryejë vaksinën në qendrat shëndetësore apo pikat e vaksinimit të përqendruar në të gjithë vendin. Kjo është mënyra më e mirë që të shtrojmë rrugën për një vit të ri shkollor dhe akademik sa më të mbarë e të suksesshëm. “, shkruan ministrja e Arsimit, Evis Kushi.
Kujtojmë se muaji gusht është muaji i hapur i vaksinimit dhe të gjithë personat të cilët janë mbi 18-vjeç mund të marrin vaksinën anti-COVID. Ata mund të paraqiten në qendrën më të afërt të vaksinimit dhe thjeshtë me kartën e identiteti mund të vaksinohen. Gjithashtu edhe grupet e lëvizshme janë në terren për të bërë të mundur vaksinimin e çdo qytetari. Situata me pandeminë në vendin tonë është e qëndrueshme, por ajo që vihet re nga raportimet e fundit të Ministrisë së Shëndetësisë është rritja e numrit të rasteve pozitive me COVID-19.
