Shënohet viktima e parë nga koronavirusi në Shqipëri.
Ajo është e moshuara 73 vjeç nga Durrësi, e cila kishte shfaqur probleme me frymëmarrjen.
E moshuara do të transportohej me urgjencë drejt Tiranës, por nuk mund të përballonte dot udhëtimin.
Për këtë arsye mjekët e spitalit të Durrësit e kthyën përsëri mbrapsh.
73-vjeçarja kishte ardhur nga Italia më 3 mars dhe kishte shafqur probleme me frymëmarrjen.
Njëkohësisht ajo vuante edhe nga sëmundjet kronike.
Dyshohet se e moshuara ka infektuar mjekun dhe 4 infermieret që i kanë shërbyer.
Njoftimi i Ministrisë së Shëndetësisë
“Pacientja 73 vjeçare e konfirmuar me COVID-19 ka ndërruar jetë pak minuta më parë nga komplikacionet e rënda, si pasojë e disa sëmundjeve bashkëshoqëruese kardiake dhe pulmonare.
73-vjecarja vuante nga sëmundje të tjera bashkëshoqëruese: Insuficience kardiake kronike, SPOK, Nyha III, Fibrilation atrial, hypertyreisis, tatus post by pass.”
Deri më tani në vendin tonë janë shënuar 12 raste me koronavirus, ndërsa janë marrë 157 mostra.
Pacienti zero në Shqipëri është një 28-vjeçar i kthyer nga Firenze nëpërmjet pikës kufitare të Hanit të Hotit më 26 shkurt.
Për të parandaluar përhapjen e virusit, qeveria ka marrë një sërë masash, që nga mbyllja e shkollave, e lokaleve, ofrimi i shërbimeve online, apo ndalimi i grumbullimeve dhe aktiviteteve.
Autoritetet ndërkohë vijojnë me thirrjet për qytetarët, për të minimizuar sa më shumë daljet nga shtëpia.
