Të paktën 15 palestinezë, mes tyre tetë fëmijë dhe dy gra, humbën jetën pas një sulmi ajror izraelit pranë një pike shpërndarjeje ndihmash në Deir al-Balah, në qendër të Gazës.
Sipas spitalit të Martirëve të Al-Aksës, sulmi ndodhi ndërsa qytetarët qëndronin në radhë për të marrë suplemente ushqimore.
Pamje të rënda të publikuara nga spitali tregojnë trupat e fëmijëve dhe të rriturve të shtrirë në dysheme, ndërsa mjekët përpiqen të ndihmojnë të plagosurit.
Në total, të paktën 26 persona u vranë në sulme të ndryshme në Gaza gjatë së enjtes.
Ushtria izraelite deklaroi se kishte goditur një “terrorist të Hamasit” në zonë dhe shprehu “keqardhje për çdo dëmtim të personave të pafajshëm”, duke shtuar se incidenti është nën hetim.
Në morgun e spitalit, skena prekëse pasuan ndërsa familjarët i përgatitnin viktimat për varrim. Një grua, e quajtur Intisar, tha për BBC se mbesa e saj shtatzënë, Manal, dhe vajza e saj e vogël Fatima ishin mes viktimave, ndërsa djali i Manal ndodhej në gjendje të rëndë në kujdesin intensiv.
“Ajo po priste për ushqime kur ndodhi shpërthimi… pastaj gjithçka ndodhi papritur,” tregoi ajo me lot në sy. Një tjetër grua pyeti mes dhimbjes: “Për çfarë mëkati u vranë?”
Ndërkohë, në Doha po vijojnë negociatat mes Izraelit dhe Hamasit për një marrëveshje armëpushimi dhe shkëmbim pengjesh, me ndërmjetësimin e SHBA-së, Katarit dhe Egjiptit. Megjithëse ka shenja optimizmi, nuk është arritur ende një përparim konkret.
Hamasi deklaroi se ka treguar fleksibilitet, duke pranuar lirimin e 10 pengjeve, por theksoi se kërkon një marrëveshje gjithëpërfshirëse që do t’i jepte fund luftës.
Nga ana tjetër, një zyrtar izraelit deklaroi se nëse arrihet një armëpushim 60-ditor, Izraeli do ta shfrytëzonte atë për të negociuar fundin e konfliktit, përfshirë çarmatimin e Hamasit. Nëse grupi refuzon, operacionet ushtarake do të vijojnë.
Lufta në Gaza shpërtheu pas sulmit të Hamasit në Izraelin jugor më 7 tetor 2023, ku u vranë rreth 1,200 persona dhe u morën peng 251 të tjerë. Sipas Ministrisë së Shëndetësisë në Gaza, që kontrollohet nga Hamasi, që atëherë kanë humbur jetën të paktën 57,680 persona, ndërsa mbi 90% e banesave janë dëmtuar ose shkatërruar.
Popullsia është zhvendosur disa herë, ndërsa sistemi shëndetësor, infrastruktura dhe furnizimet bazë janë drejt kolapsit total.
