Procesi i rinumërimit të kutive të votimit për zgjedhjet parlamentare të 11 majit në qarkun e Tiranës vijon edhe sot në Pallatin e Sportit “Farie Hoti” në kryeqytet.
Kjo është dita e katërt e rinumërimit, ku deri më tani janë hapur 355 nga 1,282 kuti në total, rreth 30% e kutive për qarkun.
Nga të dhënat paraprake të Komisionit Qendror të Zgjedhjeve, Partia Demokratike rezulton se ka pasur 177 vota të pamerituara, të cilat janë zbritur nga rezultati fillestar. Partia Socialiste gjithashtu humbet 170 vota, sipas të njëjtit bilanc rinumërimi.
Një situatë e ngjashme vërehet edhe te disa nga partitë e tjera më të vogla. “Nisma Shqipëria Bëhet” humbet 20 vota, “Lëvizja Bashkë” 15, ndërsa Partia Social Demokrate e Tom Doshit humbet 22 vota të cilat ishin regjistruar gabimisht në numërimin e parë.
Nga ana tjetër, disa formacione të vogla rezultojnë me shtesë votash. Koalicioni i drejtuar nga Lulzim Basha ka përfituar 15 vota më shumë, ndërsa koalicioni i Enkelejd Alibeajt ka marrë 6 vota shtesë.
Procesi i rinumërimit do të vijojë në ditët në vijim, deri në përfundimin e hapjes së të gjitha kutive të votimit për qarkun e Tiranës, ku priten edhe të dhëna më të plota për ndikimin që mund të ketë ky proces në shpërndarjen përfundimtare të mandateve.
