Vijon mbledhja e Këshillit Politik, që ka nisur që në orën 18:00. Kjo mbledhje u organizua pas propozimit të Opozitës për hapjen e listave 100 %, dhe pa ndryshime të tjera në formulën e koalicioneve dhe shpërndarjes së mandateve.
Por mësohet se PS ka refuzuar të shqyrtojë këtë propozim të Opozitës duke i qëndruar versionit të vet të njëanshëm.
Gjatë debatit përfaqësuesi i PD në Këshillin Politik, Oerd Bylykbashi ka nënvizuar se po injorohet vlerësimi i ODIRH, dhe se ligji po përdoret në mënyrë të njëanshme nga ana e PS.“ODIHR ka këmbëngulur tek mosabuzimi me burimet shteterore dhe se burimi kryesor shtetëror është fuqia rregullatore, dhe ju po abuzoni me të pa nisur zgjedhjet.Ju po përdorini ndryshimin e njëanshëm të ligjit, për të krijuar favore të PS në zgjedhje. Në 2013 erdhët në pushtet me krimin, në 2016 kanabizuat vendit dhe me paratë e pista të krimit bletë zgjedhjet e 2017, tani nuk ju mjaftojnë këto dhe po përpiqeni të diktoni ndryshimet e njëanshme të rregullave. Jeni të pashpresë, jeni humbës”
Ndërkohë përfaqësuesi i PS Damian Gjiknuri nuk i është përgjigjur akuzave, duke vijuar të theksojë se nuk mund të pranojnë propozimin e Opozitës për hapjen e listave 100 %, pa ndryshime të tjera.
Mbledhja është ndërprerë për disa minuta me kërkesë të Damian Gjiknurit dhe sapo ka rifilluar.Momentalisht të pranishëm në tryezë janë përfaqësuesi i mazhorancës, Damian Gjiknuri, dhe përfaqësuesit e opozitës jashtëparlamentare, Oerd Bylykbashi e Petrit Vasili, ndërsa Rudina Hajdari e opozitës parlamentare u largua pak pasi kishte filluar mbledhja, pa dhënë sqarime, por duke thënë shkurtër se nuk mund të qëndronte në atë mbledhje.
