Publikohen pamje të reja nga zjarri që ka përfshirë pak më parë një pikë skrapi në Babrru të Tiranës. Siç shihet në videon e publikuar nga “BW”, shtëllungat e tymit dhe flakët kanë pushtuar pikën e skrapit në kryeqytet. Fatmirësisht, nuk raportohet për persona të lënduar nga ky zjarr. Vatra e zjarrit vijon prej më shumë se 30 minutash, ndërsa në vendngjarje kanë mbërritur tre zjarrfikëse dhe po punojnë për shuarjen e flakëve.
Njoftimi i Policisë:
Tiranë/Informacion paraprak – “Rreth orës 14:30, në rrugën “Dine Hoxha” ka rënë zjarr në pikën e skrapit në pronësi të shtetasit F. L, ku ka vetëm dëme materiale. Forcat zjarrëfikse ndodhen në vendngjarje dhe po punojnë për normalizimin e flakëve dhe fikjen e zjarrit. Grupi hetimor punon për përcaktimin e shkakut të rënies së zjarrit”, shkruhej në njoftimin e policisë së shtetit.
Shqipëria prej më shumë se 12 ditësh po vuan nga flakët e shumta, ashtu si në disa vende të tjera të botës. Situata sa u takon vatrave nuk duket aspak e qetë dhe duket se ngjarje të tilla po shtohen dita-ditës. Fatmirësisht, zjarri në Babrru është më i menaxhueshëm se në zonat malore e pyjore ku janë kryesisht zjarret e tjera e që janë shumë më të mëdha.
