Një video e rëndë, skena dhune, grushta në bark, dokument i një krimi horror në burgun grek të Korydhalos, i cili tregon vrasjen e një të burgosuri shqiptar.
Më 14 janar të këtij viti, humbi jetën shqiptari Albert Bako, 37 vjeç. Në video duket shqiptari që ecën nëpër korridor dhe sulmohet nga dy të burgosur të tjerë.
Oficerët e burgut duken të paaftë për të ndërhyrë dhe nuk bëjnë thuajse asgjë. Në fund të videos viktima duket në një barelë dhe transferohet në spitalin e burgut.
Albert Bako sapo ishte transferuar në burgun e Koridhalos në Greqi nga burgu i Hania kur u vra nga të dënuar të tjerë. Transferimi i tij ishte marrë vesh nga disa anëtarë të një bande rivale, të cilët e futën në kurth dhe e vranë.
Ai ishte i dënuar për sulmin që bëri në Mikrolimano në një lokal në nëntor të vitit 2014, ku u plagosën 14 persona dhe shkaku i konfliktit ishte një kërcimtare.
Gjithashtu ai është përfshirë edhe në vrasjen e avokatit grek Jorgos Antonopoulos, me porosi të një personi të tretë për një çështje korruptive.
