Policia e Shtetit ka frikësuar qytetarët e shumtë që ndodheshin në zonën e Liqenit Artificial në Tiranë, me ndjekjen që i ka bërë një autoveture, si nëpër filma.
Forca të shumta policie janë vënë në ndjekje të një automjetit të llojit “Mercedez Benz”, me ngjyrë të zezë, të cilit i kanë shkuar pas, deri në zonën e Liqenit Artificial.
Kur ka mbërritur aty, drejtuesi i mjetit për t’u shpëtuar prangave, ka braktisur mjetin, që shihet dhe në pamjet e siguruara nga “Dosja.al” dhe bashkë me personin që e shoqëronte, është larguar për t’u fshehur në zonat përreth.
Efektivët e forcave “Shqiponja”, kanë kërkuar përforcime dhe kolegët e tyre me motorrë u kanë ardhur në ndihmë, për të vijuar me bastisjen e zonës.
Pas kontrolleve në lokale dhe vendet përreth, dy persona janë shoqëruar në polici, bashkë me mjetin me ngjyrë të zezë.
Njëri prej tyre ka qëndruar të bisedojë me efektivët para shoqërimit.
Ata janë futur në makinën e policisë, ndërsa një efektiv ka hipur në mjetin e tyre për të bërë të mundur transportin.
Pamjet video të këtij aksioni tregojnë intensitetin, por identitetet e të shoqëruarve nuk dihen ende dhe as veprat penale për të cilat akuzohen, apo arsyeja që i bëri uniformat blu t’i ndiqnin.
/Burimi: Dosja.al/ GazetaReforma.com/
