Orikumi edhe pse konsiderohet si një qytezë turistike në gjirin e Vlorës, madje që në të ka edhe një port jahtesh, përsëri aty ndotja e mjedisit është një problem i mbartur prej vitesh.
Plehrat e bëra pirgje, vijojnë të hidhen prej shumë kohësh në një fushë të hapur, e cila përveç se një vatër infeksioni, shëmton edhe pamjen e qytezës sidomos kur këto plehra digjen.
Duket se kjo qytezë turistike, i ka “shpëtuar” nga vëmendja Ministrisë së Turizmit, e cila herë pas here bën sikur jep ndonjë fond me prioritet për zonat turistike.
Por në Orikum jo vetëm që për mbetjet urbane as që është menduar, por prej shumë vitesh mbetjet urbane hidhen në këtë fushë, duke e kthyer zonën në rrezik për banorët.
Një vendim absurd i këshillit bashkiak në vitin 2004 e ktheu këtë fushë, në një zonë për grumbullimin e plehrave.
Sipërfaqja shtohet çdo ditë jo vetëm me mbetje që duan dekada të asgjësohen vetvetiu nga natyra, por edhe deri te lëkurët e bagëtive.
Gjithçka ndodh shumë pranë qytezës së Orikumit, një destinacion turistik gjatë verës.
Përfaqësuesit e njësisë administrative thotë se landfilli i Sherishtës do të jetë zgjidhja e kësaj problematike të mbartur në vite, por deri atëherë, jeta e banoreve rrezikohet nga plehrat në një fushë jo të përshtatshme dhe shpesh, edhe prej tymit të djegies së tyre.
/Burimi: TCH/ GazetaReforma.com/
