Reshjet e dendura të shiut në zonat malore kanë sjellë probleme të shumta sidomos në zonën turistike të Valbonës në Tropojë.
Lumi i Sylbicës në këtë zonë, ka dalë nga shtrati me furi të madhe si pasojë e prurjeve të shumta nga përrenjtë malorë duke shkaktuar dëmtime të mëdha në ekonominë e zonës dhe duke rrezikuar jetën e të paktën 80 banorëve të Valbonës.
Reshjet intensive të shiut sidomos gjatë natës së fundit e bënë lumin e Sylbicëss nga një rrëke në një “përbindësh” duke e nxjerrë nga shtrati dhe duke sjellë gurë e baltë që kanë bllokuar edhe rrugën automobilistike për në bjeshkët e kësaj zone në bashkinë e Tropojës.
Ujërat e furishëm dhe rrëshqitja e dherave e kanë bërë të pakalueshme rrugën dhe 80 banorë të zonës kanë mbetur të izoluar.
Siç shihet qartë edhe në videon e mëposhtme të siguruar nga “Faxnews.al”, rrjedha e ujit po merr me vete gjithçka.
Madje ka shkatërruar edhe një shtëpi prej druri, si dhe ka dëmtuar ambientet e një lokali në këtë zonë.
Pritat mbajtëse në shtratin e lumit, si dhe vendosja e rrjetave mbrojtëse duhet të ndërtohen menjëherë.
Sakaq, edhe aksi Bajram Curri -Valbonë vijon të jetë i bllokuar, për shkak se dherat kanë bllokuar rrugën.
Bashkia Tropojë ka ndërhyrë disa herë për hapjen e këtij segmenti, por ai bllokohet sërish sa herë që në zonë bien shira të furishëm, për shkak të prurjeve malore.
/Burimi: Faxnews.al/ Përshtati: GazetaReforma.com/
