Prokuroria e Posaçme ka nisur hetimet për kryebashkiakun e Bulqizës, Lefter Alla.
Ky i fundit shfaqet në një video, duke konsumuar kokainë, në ambjentet e një lokali.
Denoncimi u bë nga ish-deputeti demokrat Ervin Salianji, ndërsa materiali filmik u publikua nga gazetari Artan Hoxha.
Ky i fundit tha se kishte marrë kërcënime pas publikimit të videos.
Kryebashkiaku i Bulqizës ndërkohë ka mohuar akuzat ndaj tij.
Alla është shprehur se video është e montuar nga PD dhe nuk është ai personi që shfaqet në materialin filmik.
Ndër të tjera ai shtoi se video po përdoret për ta shantazhuar.
Lefter Alla u zgjodh në krye të Bashkisë së Bulqizës, në zgjedhjet e 30 qershorit.
Ai është kryebashkiaku i radhës socialist që rrezikon postin.
Kujtojmë se deri më tani është larguar kryebashkiaku i Shkodrës, Valdrin Pjetri, Agim Kajmaku i Vorës, për shkak të fshehjes së dënimeve në formularin e dekriminalizimit.
Ndërkohë është dorëhequr edhe kryebashkiakja e Durrësit, Valbona Sako, pas gafës që bëri me viktimat e tërmetit.
PD ka denoncuar gjithashtu edhe Mark Babanin e Vaut të Dejës, Agron Malajn e Matit dhe Qerim Ismailajn e Mallakastrës, ndërsa bën me dije se janë në sitë 15 kryebashkiakë të tjerë.
