Deputetja e Partisë Demokratike, Dhurata Çupi ka folur në lidhje me amendamentin e prezantuar nga demokratët për Vettingun e politikanëve.
Ajo këmbëngul se Vettingu i politikanëve është i domosdoshëm dhe shton se në qoftë se nuk votohet në Kuvend tregon frikën që ka kryeministri dhe socialistët e tjerë. Çupi ka thekuar edhe një herë tjetër se emergjente është vettingu politikanëve, pasi në parlament duhet të ulen deputetë me integritet.
“Janë tre propozime serioze që iu vijnë në ndihmë të opinionit të mbarë shqiptarëve. Ne kemi bërë tre propozime, për t’iu thënë shqiptarëve që pas 30 vitesh tranzicion meritojnë zgjedhje të lira dhe të ndershme, ata meritojnë t’i drejtojnë politikanë të ndershëm dhe ata meritojnë, sa i përket reformës territoriale, për t’iu shërbyer sa më pranë. (…) Propozimet tona të parin që mund të vënë në vështirësi janë kryeministrin dhe gjithë pushtetin ekzekutiv, ashtu edhe përfaqësuesit e kryeministrit në pushtetin legjislativ. Ata duhet të jenë edhe më të frikësuar nga propozimet tona. Rama për të devijuar nga propozimet përdor batutat. Afati KPK mbaron në 2022 dhe ka kohë për të detajuar dhe diskutuar rreth propozimeve të PS, nuk është emergjente. Ajo që sot është emergjente për shqiptarët edhe që parlamenti në një kohë sa më të afërt të ketë individë me integritet” u shpreh Çupi.
