Janë zbardhur detaje të reja nga vetëvrasja e administratorit të shoqërisë “Micro Credit Albania”, Olsi Ibros ditën e sotme në Tiranë. Ibro, i cili ishte në kërkim si i përfshirë në skandalin e mikrokredive, u hodh nga lartësia e një pallati në ndërtim, që ndodhej pak metra larg shtëpisë së tij.
Sipas raportimeve në media, pas sekuestrimit të pamjeve filmike të kamerave të sigurisë në zonë, është ngritur një pistë e re hetimi lidhur me ngjarjen. Ibro dyshohet se më parë se ka pirë helm dhe më pas për shkak të gjendjes shëndetësore të rëndë që i ka shkaktuar vetëhelmimi, është ngjitur në pallatin në ndërtim për t’u vetëhedhur dhe për t’i dhënë fund jetës.
Kamerat e sigurisë kanë kapur 45-vjeçarin të vetëm brenda në makinën e tij të parkuar para pallatit ku u vetëhodh. Nga pamjet që ka grupi hetimor, Ibro ka qëndruar për një kohë të gjatë i vetëm brenda në makinë, nga ku dyshohet se aty mund të ketë konsumuar edhe helmin. Ekspertiza mjekoligjore pritet të zbardhë shkakun e saktë, nëse ai është vetëhelmuar para se të hidhej nga pallati në ndërtim.
