Pas raportimit se në godinën e Kryeministrisë janë identifikuar disa persona të infektuar me Covid-19, ndërtesa është boshatisur.
Urdhëri i prerë ka bërë që të gjithë punonjësit të largohen nga godina dhe të punojnë nga shtëpia.
Mësohet se një prej të infektuarve me koronavirus ishte një gardist që qëndronte në hyrje të ndërtesës.
Megjithatë, ndonëse të gjithë janë larguar nga godina, “i zoti i shtëpisë”, kryeministri Rama, duket se s’ka aspak frikë, pasi pasditen e sotme, kur paralajmëroi qytetarët që të tregonin kujdes dhe të respektonin masat, ishte në zyrën e tij.
https://www.facebook.com/edirama.al/videos/261939418415671/
Kujtojmë se Kryeministria nuk është i vetmi institucion që është prekur nga Covid-19, pasi raportohet për të infektuar edhe në Ministrinë e Bujqësisë, të Postës Shqiptare, zyrave të OSHEE-së, të Ministrisë së Financave, të Bashkisë Tiranë dhe Ministrisë së Infrastrukturës.
Nga ana tjetër, të gjithë punonjësit e SPAK kanë bërë tamponin, por asnjë prej tyre nuk ka rezultuar pozitiv.
Sot është zgjeruar harta e të prekurve me 28 të prekur në Tiranë, 18 në Shkodër, 10 në Krujë, 8 në Durrës, 7 në Vlorë, 3 në Kamëz, nga 2 raste në Kukës, Elbasan, Fier dhe nga 1 i prekur në Korçë dhe Pukë.
Numri i rasteve aktive në vend është 571 dhe që nga nisja e pandemisë janë infektuar 1,672, kurse numri i viktimave ka shkuar në 37.
