Prokuroria ka bërë me dije se identifikimi i Admir Murataj i cili humbi jetën në grabitjen e Rinasit, si rezultati i përplasjes me armë ishte i vështirë për shkak të ndryshimit të pamjes.
Murataj kishte bërë ndërhyrje kirurgjikale në hundë dhe në mjekër dhe gjithashtu kishte mbjellë flokë tek pjesa e përparme. Kanë qënë këto ndryshime që kanë vonuar identifikimin e tij.
Edhe kur janë marrë shenjat e gishtërinjve me aparaturën e ALEAT janë nxjerrë vetëm 5 elementë, ndërkohë që duhet të ishin 8 elementë që përputhen.
Sipas burimeve të “balkanweb”, policia ka pasur dyshime se Murataj mund të kishte qenë anëtar apo pjesëtar i grupit të grabitësve, por kur është bërë këqyrja e kufomës nuk është gjetur ngjashmëri. Më pas u kërkua ndihma e Greqisë dhe u bë identifikimi.
Kujtojmë se nga supergrabitja e së Martës pasdite, u grabitën 10 milionë euro. Policia po vazhdon hetimin, por ende nuk ka ndonjë emër të grabitësve të tjerë.
Murataj, megjithëse në kërkim ndërkombëtar që prej vitit 2013, u konsiderua si truri organizator i 3 grabitjeve spektakolare në Tiranë të më shumë se 5 milionë eurove.
Mësohet se trupi i Admir Murataj do të tërhiqet nesër në orën 8 nga familja.
