Gjykata e Lartë ka vendosur të martën mbi fatin e ish ministrit të brendshëm Saimir Tahiri.
Përmes një vendimi, Gjykata bën me dije se ka vendosur që të rrëzojë vendimin e datës 26 qershor të vitit 2020 të Gjykatës së Posaçme të Apelit për Korrupsionin dhe Krimin e Organizuar. Në vendimin e Gjykatës së Lartë thuhet se do të bëhet rishqyrtim në Gjykatën e Apelit, por me një tjetër trup gjykues. Po ashtu vendimi sqaron se Gjykata ka rrëzuar kërkesën e të gjykuarit Jaeld Çela për zëvendësimin e masës së sigurimit “Arrest në burg”.
Vendimi:
Kolegji Penal i Gjykatës së lartë
Pasi dëgjoi relatimin e gjyqtarit Ilir Panda; Prokurorin pranë Gjykatës së Lartë i cili kërkoi lënien në fuqi të vendimit të Gjykatës së Posaçme të Apelit për Korrupsionin dhe Krimin e Organizuar, Mbrojtësin e të pandehurit Saimir Tahiri që kërkoi prishjen e vendimit të Gjykatës së Posaçme të Apelit për Korrupsionin dhe Krimin e Organizuar dhe kthimin e çështjes për rigjykim në po atë gjykatë, me tjetër trup gjykues dhe Mbrojtësin e të pandehurit Jaeld Çela, që kërkoi prishjen e vendimit të Gjykatës së Posaçme të Apelit për Korrupsionin dhe Krimin e Organizuar dhe të vendimit të Gjykatës së Shkallës së Parë për Krime të Rënda, zgjidhjen e çështjes pa e kthyer për rishqyrtim, me pasojë deklarim të pafajësisë për rekursuesin Jaeld Cela, dhe në rast se nga Gjykata nuk do të konstatohet mundësia e shqyrtimit të kësaj çështjeje, kthimin e saj për rishqyrtim në po atë gjykatë, me tjetër trup gjykues.
Kolegji Penal i Gjykatës së Lartë, mbështetur në nenet 441, paragrafi 1, shkronja c) dhe 260 të Kodit të Procedurës Penale,
V E N D O S I:
1. Prishjen e Vendimit nr. 16, datë 26.6.2020, të Gjykatës së Posaçme të Apelit për Korrupsionin dhe Krimin e Organizuar dhe dërgimin e çështjes për rishqyrtim në këtë gjykatë me një tjetër trup gjykues.
2. Rrëzimin e kërkesës së të gjykuarit Jaeld Çela për zëvendësimin e masës së sigurimit “Arrest në burg”.
Në shtator të 2021 çështja e Tahiri u rikthye, pasi ai u fut në rigjykim. Ai u përball me drejtësinë në Gjykatën e Apelit.
Më herët SPAK kishte kërkuar që të lihet në fuqi vendimi i apelit të GJKKO për rigjykim të Tahirit. Ndërkohë, vetë ish-ministri kërkoi ndryshimin e vendimit të Apelit dhe kthimin po në këtë shkallë me trupë tjetër gjykuese.
Gjykata e shkallës së Parë e dënoi Tahirin me 3 vjet shërbim prove për shpërdorim detyre, një akuzë që nuk ishte ngritur nga Prokuroria.
