Qeveria prej kësaj jave ka nisur lehtësimin e një sërë masash në qytetet me rrezikshmëri të ulët, teksa kanë rinisur aktivitetin e tyre një sërë aktvitetesh.
Sakaq, ditën e sotme kryeministri Rama ka bërë me dije se nga 11 majii do lehtësohen të tjera masa.
Mbrëmjen e sotme Eugena Tomini, shefe e Inteligjencës Epidemike në ISHP, ka folur në “Opinion” lidhur me fazën e dytë të lehtësimit të masave kundër përhapjes së Covid-19.
Tomini u shpreh se hapja do të jetë graduale dhe se ky proces do të varet nga bilanci i rasteve të reja në ditët në vijim, teksa theksoi se faza e dytë nuk do të realizohej në rast se në spitale do të jenë të shtruar 90 pacientë me Covid-19 dhe 10-15 prej tyre të jenë në terapi intensive.
“Masat në drejtim të hapjes do të mbështeten në tre nivelet e rriskut që janë, i ulët, i mesëm dhe i lartë. Ndërkohë, monitorimi i hapjes do të monitorohet në një interval kohor prej dy javësh dhe do të vijojë më pas me lirimin e masave duke parë kufizimet dhe të lëvizjes së popullatës do të monitorohen për dy muaj. Hapja do të jetë gradualisht. Rekomandohet respektimi i masave personale dhe kapacitetet në drejtim të gjurmimit të kontakteve dhe kapacitetet në drejtim të epidemiologjik. Ky kapacitet do të rritet nga 70-80 që e kemi aktualisht në 90 gjurmim. Gjurmimi është i vështirë në kohë paqe e jo më në kohë lufte. Prandaj kemi disa parametra që i kemi vendosur kundrejt nivelit të rriskut. Nëse kemi me një mesatare javore 12 raste kundrejt gati 90 pacientë të shtruar dhe prej tyre 10-15 pacientë në terapi intensive nuk bëhet faza e dytë e hapjes.”
Nga 9 marsi e deri tani në vendin tonë janë identifikuar 766 të infektuar, nga të cilët 455 janë shëruar, teksa mbrëmjen e sotme ka shkuar në 31 numri i viktimave.
