Gazment Bardhi, kryetari i grupit parlamentar të Partisë Demokratike, ka reaguar ndaj vendimit të fundit të Gjykatës Kushtetuese, e cila shfuqizoi disa dispozita të Ligjit për Komisionin Hetimor. Sipas Bardhit, ky vendim është një konfirmim i asaj që opozita ka paralajmëruar prej kohësh: shkeljet e Kushtetutës nga ana e mazhorancës socialiste dhe tentativat e saj për të mbyllur hapësirat e kontrollit parlamentar të opozitës.
“Vendimi i djeshëm i Gjykatës Kushtetuese për shfuqizimin e të gjitha dispozitave të kundërshtuara nga ana jonë dhe të propozuara nga një deputete njëpërdorimshe nuk përbën asnjë surprizë sepse antikushtetutshmëria ishte ulëritëse. Mazhoranca socialiste e ka bërë tashmë rregull shkeljen e Kushtetutës dhe tentativën për t’i mbyllur çdo hapësirë opozitës,” deklaroi Bardhi.
Gjykata Kushtetuese konstatoi disa papajtueshmëri me Kushtetutën në Ligjin për Komisionin Hetimor:
- Njëzëri, papajtueshmërinë me Kushtetutën të nenit 4, që lidhet me nismën për krijimin e komisionit hetimor.
- Me shumicë votash, papajtueshmërinë me Kushtetutën të përmbajtjes së nenit 7, që parashikon vendimin e ndërmjetëm për marrjen e provave.
- Me shumicë votash, papajtueshmërinë me Kushtetutën të nenit 9, që lidhet me marrjen e lejes nga prokuroria dhe gjykata për pyetjen e dëshmitarëve.
- Me shumicë votash, interpretimin pajtues të nenit 6, pika 3, shkronjat “c” dhe “d”, në lidhje me marrjen e provave pa pjesëmarrjen e publikut.
Bardhi gjithashtu kritikoi Presidentin e Republikës, Bajram Begaj, për mosrefuzimin e shpalljes së ligjit, duke theksuar se Presidenti zgjodhi t’i shërbejë si “ushtar” Edi Ramës në vend që të respektonte Kushtetutën. “Në kulmin e një krize parlamentare, Presidenti i Republikës u ftua të luante rolin e tij kushtetues, të mos shpallte një ligj antikushtetues dhe antidemokratik, që synonte të asgjësonte opozitën. Por Presidenti zgjodhi t’i qëndronte besnik betimit për të shërbyer si një ushtar i Edi Ramës,” shtoi Bardhi.
