Për ministrin e Shtetit për Rindërtimin, Arben Ahmetaj, situata e koeronamvirusit është vetëm “kalimtare” dhe ekonomia e vendit po rimëkëmbet dhe po e merr vete nga karantina.
Kështu ka deklaruar sot ministri Ahmetaj, kur tha se punësimi 2 muaj pas shpërthimit të pandemisë u rikuperua. Ai shtoi gjithashtu se u rikuperuan 32 mijë vende pune, ndërsa shtoi se nga kontributet kanë mbledhur 1 milionë dollarë, më shumë krahasuar me vitin e kaluar.
“Punësimi e mori veten. Rikuperuam 32 mijë vende pune. Ne kemi mbledhur nga kontributet 1 milion dollarë më shumë krahasuar me vitin e kaluar. Ekonomia e ka marrë veten. Kur dëgjoj pseudokolapsin, se kanë dëshirë të marrin mandatin e 5. Të vetmit që mund të pësojnë humbje të lehtë janë lokalet e natës, që janë zgavra të infektimeve”,- nënvizoi Ahmetaj.
Ai tha se nga paketa e parë e ndihmës ekonomike përfituan 242.842 të punësuar, ndërsa në paketën e dytë ishin 172 mijë të punësuar.
I pranishëm në konferencën e përbashkët për shtyp me kryeministrin Edi Rama, ministren e Shëndetësisë dhe Mbrojtjes Sociale, Ogerta Manastirliu, ministri Ahmetaj u shpreh se, janë 242.842 të punësuar që kanë përfituar dhe 83 mijë biznese me ndihmë direkte 121 milionë dollarë.
Ministri Ahmetaj tha se, “Paketa e dytë financiare ishte 7 miliardë lekë, plus garancia e dytë sovrane bëjnë 15 miliardë lekë, shtyrja e tatim fitimit që dëgjon politikanë të opozitës me bolori, që do t’u heqim taksat, taksat e biznesit të vogël tashmë janë hequr. Për shumë kategori janë shtyrë dhe dua ta ripërsëris 100 herë atë që kjo qeveri, ka bërë me biznesin e vogël me xhiro deri në 14 milionë lekë, zero taksa, zero tatim fitimi për 14 milionë e poshtë dhe zero TVSH 10 milionë e poshtë”.
/GazetaReforma.com/
