Covid-19, virusi që ka ‘paralizuar’, frikësuar dhe ka ngritur shumë pikëpyetje në mendjet e njerëzve deri tani ka shënuar 263,349 viktima, 3,804,912 të infektuar, teksa 1,287,570 persona janë shëruar.
Nuk dihet ende çka do ndodhë në të ardhmen, tashmë që virusi ka ‘gjunjëzuar’ edhe kombet më të fuqishme në botë, ndërsa mjekët ende nuk kanë një ilaç në duart e tyre, teksa deri tani bluzat e bardha kanë bërë kombinime medikamentesh, ose kanë përdorur antibiotikë, që kanë mundur ‘armikun’ në murtajat e mëparshme.
Duke iu referuar shkencëtarëve, vaksina e parë mund të jetë e disponueshme pas afro një vit, ndonëse shkenca prej muajsh po punon vetëm në këtë drejtim.
Të gjendura përballë këtij fakti shumë shtete tashmë kanë nisur fazën e parë të lehtësimit të masave, duke u rikthyer pak nga pak në jetën normale, sigurisht me kushtet që i imponon pandemia.
Drejtori i Përgjithshëm i Organizatës Botërore të Shëndetësisë, Tedros Adhanom Ghebreyesus, ka thënë se teksa numri i rasteve të prekura me koronavirus është duke rënë në Europën Perëndimore, e kundërta është duke ndodhur në Euopën Lindore, në Afrikë, Azinë Juglindore, Lindjen e Mesme dhe Amerikë.
Ghebreyesus ka paralajmëruar qeveritë që të menaxhojnë me kujdes vendimet për lehtësim të masave të izolimit, pasi “rreziku i kthimit të virusit është shumë real”, duke përmendur gjashtë kushte që duhen plotësuar para lehtësimit të masave të izolimit:
- Numri i rasteve duhet të jetë në rënie, por vëzhgimi i të infektuarve duhet të jetë i lartë;
- Sistemet shëndetësore duhet të jenë të gatshme të testojnë, trajtojnë dhe izolojnë të infektuarit;
- Në spitale dhe shtëpi kujdesi duhet të ketë shpërthime minimale;
- Masat mbrojtëse duhet zbatuar në vendet e punës dhe shkolla;
- Numri i rasteve të importuara duhet të jetë i menaxhueshëm;
- Komuniteti duhet të veprojnë në përputhje me “normalen e re”.
Vendi ynë është parashikuar të hapet në 3 të hëna, përkatësisht 4, 11 dhe 18 maj, teksa nga e hëna e kësaj jave kemi hyrë në fazën e parë.
Në datën 4 maj:
-Zonave të gjelbra do t’u bashkohen qytetet e: Tropojës, Rrogozhinës, Peqiniy, Belshit, Cërrikut, Gramshit, Urës vajgurore, Kuçovës, Beratit, Poliçanit, Skraparit, Devollit, Pustecit, Maliqit, Mallakatrës, Kolonjës, Vlorës dhe Selenicës.
-Do lejohen taksitë në lëvizje ndërqytetase me dy pasagjerë të një familjeje.
-Të riatdhesuarit që vijnë nga zonat e kuqe do vetë karantonohen në shtëpi.
Në datën 11 maj
-Do hapen me protokolle siguria: parukeritë, berberët, klinikat dentare dhe dyqanet në qendrat tregtare.
-Zgjerohet orari i lëvizjes së automjeteve brenda qarkut nga ora 05:00-17:30.
-Të gjithë të riatdhesuarit do vetë karantinohen në banesa.
Në datën 18 maj
-Do të hapen shërbimet bar-restorant vetëm në ambientet e jashtme deri në orën 17:30.
-Shtohen fluturimet e të riatdhesuarve.
