10 ditë pas rrëmbimit të Jak Prengës, ditën e djeshme, Forcat RENEA zbarkuan në Shijak.
Ata rrethuan kompleksin “Golden”, në pronësi të vëllezërve Altin dhe Emiljano Hajri.
Deri më tani janë arrestuar Leonard Hajri, së bashku me O.T., B.H. dhe E.H., të gjithë banues në Shijak.
Ndërsa, Altin Hajri është shpallur në kërkim.
Duket se shkak për këtë ngjarje të rëndë është bërë një marrëdhënie e dështuar mes trafikantësh droge për një sasi shumë të madhe kokaine.
Sipas Top Channel, autoritetet shqiptare besojnë se bëhet fjalë për një organizatë të fuqishme kriminale që ka veprimtari në Angli, disa shtete të BE, në Ekuador dhe Shqipëri.
A.Prenga, vëllai i Jak Prengës, ishte pjesë e grupit dhe detyra e tij ishte të nxirrte 280 kg kokainë nga porti në Angli.
Mësohet se ai e ka nxjerrë sasinë, por nuk e ka dorëzuar te grupi në fjalë.
Ky veprim nuk i ka pëlqyer aspak bandës, që vendosi të hakmarret.
Pjesë e planit hakmarrës të grupit u bë Jak Prenga, i cili u rrëmbye me një automjet të vjedhur.
Siç bëhet me dije ky automjet i përket një këngëtareje të njohur, identiteti i të cilës nuk është bërë me dije ende.
Me hetimet rreth kësaj çështjeje po merren edhe autoritetet britanike.
Jak Prenga, 49-vjeç, u mor peng në rrugën “New York” në Kamëz më 17 janar.
Nga vështrimet që policia u ka bërë kamerave të sigurisë të resortit “Golden”, 49-vjeçari u fut i gjallë aty, por është nxjerrë i pajetë.
Trupi i tij është zhdukur.
