Mëngjesin e 17 majit me vendim të Këshillit Bashkiak të Tiranës, u shemb godina e Teatrit Kombëtar, vendim ky i pasur me dy protesta të njëpashnjëshme, të cilat është përdorur edhe dhuna policore ndaj qytetarëve.
Opozita ka mbështetur protestat dhe ka thënë se tashmë do të përkrah çdo tubim të qytetarëve, pasi sipas tyre është kaluar vija e kuqe, teksa pritet që protesta e radhës të zhvillohet nesër në orën 17:30.
Pas shembjes, kryebashkiaku Erion Veliaj kërkoi bashkëpunim me artistët, ndërsa kryeministri Edi Rama premton se godina e re do të jetë moderne dhe do plotësojë të gjithë kërkesat e aktorëve.
Sakaq, nuk kanë munguar edhe reagimet nga ndërkombëtarët.
BE iu bëri thirrje palëve të tregojnë kufizim dhe të shmangin përshkallëzimin e situatës, ndërsa amabasada britanike në Tiranë tha se dhuna minon demokracinë, edhe ambasadori gjerman është i të njëjtit mendim.
Së fundmi, Veliaj ka folur për ndërtimin e Teatrit të ri, duke u shprehur se do të marrë 3-4 muaj detajimi i projektit dhe ndërtimi mund të fillojë në vjeshtë.
Sipas Veliajt kjo periudhë 3-4 mujore mund të shërbejë për bashkëpunim, ndërsa tha edhe njëherë se shtrin dorën për të gjithë ata që nuk ishin dakord me shembjen.
“Ajo që ne parashikojmë është që të fillojmë të përdorim gjithë verën për detajimin e projektit. Do të marrë 3-4 muaj. Për këta që do jetojnë këtu dhe që kanë pasur mendime të ndryshme ky është një moment fantastik për të bashkëpunuar, dhe unë shtrij prap dorën që të përdorim këto muaj. Çfarë iku iku. Besoj se nga vjeshta ne do të fillojmë ndërtimin, ndërkohë që kemi rreth 17 institucione financiare që kanë shprehur të jenë pjesë”, u shpreh Veliaj.
Në një intervistë për Abc News Veliaj është shprehur se prishja e teatrit nuk ka asnjë lidhje me politikën, por është një vendim në kuadër të punës për qytetin.
Më tej, ai u shpreh se vendimi për prishjen e Teatrit është marrë, pasi atij i është konfirmuar se ai nuk është i mbrojtur si monument kulture dhe ishte e nevojshme një vendim i tillë.
“Unë nuk dua që askush nga bashkia e Tiranës të gjendet në një situatë që një pronë ti fusë në telashe, por që momentin e parë që ne e kemi marrë i jemi dërguar institutit të ndërtimit që na ka komunikuar se godina duhet të shembet. Pyetëm në institucionin e Monumentit të Kulturës nëse është apo jo ndërtesa e mbrojtur dhe më thanë jo. Do bëjmë siç bëmë me gjimnazin e Sami Frashërit, me qendrën socialen kombinat e shumë ndërtesa të tjera që është e nevojshme për ndërhyrje. Nuk dua që këto njerëz të që vënë kujën nesër të thonë se tashmë unë e kisha në dorë dhe nuk bëra asgjë“, tha Veliaj.
Ndërkohë, Veliaj i është përgjigjur edhe liderëve të opozitës të cilët janë shprehur se do të rindërtojnë teatrin ashtu siç ishte.
Kryebashkiaku iu drejtua presidentit Meta, i cili bëri thirrje të mos ndalet kauza për Teatrin deri në rindërtimin e tij, duke thënë se ai ka pasur mundësi ta shpallte atë që e cilësoi si godinë tallashi, monument kulture por nuk e bëri sepse ishte godinë pa vlerë, ndërsa sot po tenton ta përdorë për sulme politike.
