Gjykata e Posaçme kundër Korrupsionit dhe Krimit të Organizuar ka reaguar ndaj deklaratave të kryebashkiakut të Tiranës, Erion Veliaj, i cili kishte akuzuar prokurorin Ols Dado për fyerje gjatë seancës për caktimin e masës së sigurisë ndaj tij.
Nëpërmjet një komunikate për mediat, GJKKO ka përgënjeshtruar këto akuza, duke sqaruar se prokurori nuk ka përdorur asnjë gjuhë denigruese gjatë seancës gjyqësore. Gjykata ka mohuar gjithashtu vërtetësinë e transkripteve të publikuara nga Veliaj në rrjetet sociale, duke theksuar se ato nuk përputhen me regjistrimet zyrtare të seancës.
“Nisur nga kërkesat për informacion dhe interesimi i vazhdueshëm në lidhje me vërtetësinë e procesverbalit të seancës gjyqësore të datës 12.02.2025, të publikuar nga Erion Veliaj në rrjetin e tij social ‘Facebook’, ju bëjmë me dije se informacioni i publikuar nuk është i vërtetë,” thuhet në deklaratën e GJKKO.
Gjykata sqaroi gjithashtu se, pas kontrollit të regjistrimeve audio të seancës, veçanërisht në intervalin kohor 18:34:02 – 18:34:57, si dhe pas shqyrtimit të procesverbalit zyrtar, nuk rezulton që prokurori Ols Dado të ketë përdorur fjalën “ndyrësirë” apo ndonjë shprehje tjetër ofenduese.
