Kryebashkiaku i Tiranës, Erion Veliaj, është i pranishëm prej dy orësh në Prokurorinë e Posaçme (SPAK), ku po pyetet për disa dosje hetimore dhe hetimin pasuror që po kryhet ndaj tij dhe familjarëve të tij.
Veliaj po jep llogari për disa çështje, përfshirë qarkullime financiare të dyshimta nga Bashkia e Tiranës, në favor të familjarëve të tij.
Mes dosjeve që SPAK po heton janë aferat e inceneratorëve të Tiranës, dosja “5D”, shembja e Teatrit Kombëtar, ndërtimi i kullave në kryeqytet, shembjet te “5 Maji”, dhe rindërtimi i banesave të shkatërruara nga tërmeti i vitit 2019.
Ky është rasti i dytë që Veliaj paraqitet në SPAK, pasi më 30 prill ai dëshmoi për aferën e inceneratorëve.
Po ashtu, disa ditë më parë, bashkëshortja e tij, Ajola Xoxa, u mor në pyetje.
Në këtë seancë, Veliaj ishte shoqëruar nga Alban Dokushi, drejtor juridik i Bashkisë së Tiranës, i cili nuk është avokati i tij, duke sugjeruar se çështjet për të cilat po pyetet Veliaj lidhen me hetimet për pasurinë e tij dhe çështje të tjera të administratës së Bashkisë.
