Kryetari i Bashkisë së Tiranës, Erion Veliaj, është paraqitur në Apelin e GJKKO, ku pritet të njihet me vendimin pas ankimit të bërë për masën e arrestit me burg.
Dje, prokurorët Ols Dado dhe Altin Dumani paraqitën prova të reja, duke bërë që seanca të shtyhej për sot.
Avokati i Veliajt, Ermir Beta, ka kërkuar që masa e sigurisë “Arrest në burg” të shfuqizohet, duke theksuar se kryebashkiaku nuk paraqet rrezik për prishjen e provave, dëmtimin e hetimeve apo intimidimin e dëshmitarëve.
Ankimimi po shqyrtohet nga gjyqtari Engert Pëllumbi, i njohur për vendimet ndaj zyrtarëve të lartë, si ish-ministri Saimir Tahiri.
Në seancë janë paraqitur edhe katër biznesmenët, Elman Abule, i cili është në arrest me burg, dhe Shkëlqim Fusha, Gentian Sula, dhe Meriman Palushi, që janë nën masën e detyrimit për t’u paraqitur.
Veliaj po hetohet për “korrupsion pasiv” dhe “pastrim parash”, në bashkëpunim me bashkëshorten e tij, Ajola Xoxa, e cila po hetohet për mosdeklarim pasurie dhe është nën masën e detyrimit për t’u paraqitur.
