Erion Veliaj e ka quajtur shumë zhurmë për asgjë skandalin e të dhënave që zotëron partia socialiste. Gjatë debatit me analistën në emisionin “Real Story”, Veliaj ka thënë se e gjitha është një lojë se për kë votojnë analistët.
“Është shumë zhurmë për asgjë. Këtu po kishte interes, e çonin në Prokurori, që të fillonte një hetim. Në momentin që kjo kthehet në një lojë se për kë voton ky analist, e për kë ai, kjo është e gjitha një lojë. Është e gjitha një lojë”, tha Veliaj.
Në momentin që Arjan Vasjari tha se këto janë të dhëna sensitive dhe dhe nuk mund të trajtohet çështja me kaq lehtësi, Veliaj tha se portali që i publikoi, është një portal ordiner (referuar Lapsi.al). Kryebashkiaku i Tiranës deklaroi se PS po mundohet të digjitalizohet prej vitesh dhe kjo nuk është e paligjshme. Sipas Veliajt, është portali ai që sajon për të dhëna personale.
“Të dëgjova me shumë vëmendje. Mos më ndërprit. Patjetër që është një portal ordiner, që sajon, e do duhet të përgjigjesh për një gjë të rreme. Ne mundohemi të digjitalizojmë partinë tonë prej vitesh. Këtë e bëjnë të gjitha partitë në botë. Për sa kohë partitë kanë databaza, nuk është shkelje e ligjit. Ai portal e dreqos këtë punë, kur sajon për të dhëna personale”, ka thënë Veliaj.
Ai shkoi edhe më tej kur tha se kush ngre një akuzë të tillë, ka të drejtë të shkojë edhe në prokurori dhe për të më problematike është tabela që u publikua në për vjedhjen e votave nga LSI në Pukë. Kjo gjë sipas tij tregon se Partia Socialiste është e pastër.
“Kush e bën një akuzë të tillë, ka edhe detyrimin të shkojë në Prokurori, kush e përdor për politikë, është problem i tyre. Sapo doli vjedhja e votave të LSI në Pukë, doli tabela e ‘Exel-it’ dhe gjëja më e madhe ishte që Bahri Fariu, votonte LSI dhe jo PD. Çojeni në Prokurori dhe le të vendosë. Kjo tregon, që ne jemi të pastër dhe databazi që kemi ne është në mënyrë kapilare. Partitë e ndryshme kanë informacion dhe mbledhin databaze dhe i përdorin në mënyrë inteligjente”, tha Veliaj.
