Kryeministri Edi Rama dhe kryetari i Bashkisë Tiranë, Erion Veliaj kanë inspektuar punimet për ndërtimin e 900 apartamenteve në lagjen “5 Maj”. Veliaj ka thënë se në këto apartamente do të strehohen 3150 rezidentë dhe se banorët do e zgjedhin vetë nëse duan para kesh për banesën e shkatërruar nga tërmeti i nëntorit të vitit 2019, apo nëse duan një apartament në lagjen e re.
“Shpronësimi kalon javën tjetër, është vlerësuar me çmimin e tregut dhe qytetarët kanë mundësi të zgjedhin ose pagesën kesh, ose një apartament këtu, e cila do të jetë prapë me indeksin e hipotekës, por që ka një vlerë në treg që sa vjen e rritet çdo vit. Pjesa më e madhe kanë zgjedhur të marrin një apartament këtu, në vend që të marrin pagesën kesh”, tha Veliaj.
Edhe pse Komisioni Qendror i zgjedhjeve e ka ndaluar dorëzimin e çelësave të shtëpive gjatë fushatës elektorale, Veliaj dhe Rama nuk ndalen dhe vazhdojnë propagandën e tyre. Ka kaluar më shumë se një vit nga tërmeti i nëntorit, dhe vetëm tani qeveria dhe bashkia janë kujtuar të ndërtojnë shtëpitë e banorëve të prekur nga tërmeti.
Për një vit këta banorë a qëndruan në rrugë?
Pse ndërtimi i banesave nisi pikërisht tani, vetëm pak muaj para zgjedhjeve?
Rasti i tërmetit është ndër të shumtat raste me të cilat qeveria nuk mund të krenohet me menaxhimin. Shumë banorë janë ende në çadra, ndërkohë që Edi Rama i shtoi një borxh të majme vendit në konferencën e Parisit me donacionet që i reklamoi si arritje. Veliaj dhe Rama nuk ndalen në pushtetin e tyre, madje nuk e kanë për turp të bëjnë propagandë edhe me fatkeqësitë e të tjerëve.
