Gjykata e Vlorës ka shpallur të pafajshëm pesë efektivët e policisë të akuzuar për shpërdorim detyre në lidhje me tragjedinë e ndodhur në gusht të vitit 2022 në plazhin e Potamit, ku humbi jetën 7-vjeçarja Jonada Avdiaj.
Pas një procesi gjyqësor që zgjati tri vite, trupa gjykuese vendosi se nuk kishte prova të mjaftueshme për të fajësuar efektivët për neglizhencë në përmbushjen e detyrave gjatë sezonit turistik.
Në seancën përfundimtare të mbajtur këtë të mërkurë, prokuroria kishte kërkuar dënimin me nga 1 vit e 6 muaj burg për secilin prej të pandehurve, duke argumentuar se ata kishin dështuar të garantonin masat e sigurisë në plazh, një dështim që, sipas organit të akuzës, kishte ndikuar në ndodhinë e ngjarjes tragjike. Por gjykata rrëzoi këto pretendime dhe i la të lirë të gjithë.
Reagimi më i fortë pas shpalljes së vendimit erdhi nga gjyshi i Jonadës, Ismet Avdiaj, i cili u shpreh i thyer emocionalisht dhe thellësisht i zhgënjyer nga vendimi. Ai deklaroi se provat dhe pretendimet që familja kishte sjellë gjatë procesit nuk u morën parasysh dhe e cilësoi vendimin si një tjetër padrejtësi mbi tragjedinë e familjes së tyre, duke përmbyllur reagimin e tij me fjalët: “Drejtësia na vrau sërish.”
Ndërkohë, për drejtuesin e gomones që shkaktoi vdekjen e së miturës, oficeri i policisë Arjan Tase, gjykata dha një vendim të prerë më herët: 18 vite burg për “vrasje me dashje”. Duke përfituar ulje dënimi sipas gjykimit të shkurtuar, Tase u dënua përfundimisht me 12 vite burgim dhe aktualisht po e vuan dënimin.
Çështja ndaj tetë efektivëve të tjerë që ishin nën hetim për të njëjtën ngjarje u trajtua veçmas dhe përfundoi me shpalljen e pesë prej tyre të pafajshëm, ndërsa për të tjerët procedurat vijojnë.
