Ekspertiza për vdekjen e dy vëllezërve Sabri dhe Novruz Velaj, 90 dhe 85 vjeç, ka zbardhur shkaqet e humbjes së jetës së tyre.
Dy vëllezërit, të cilët u gjetën të vdekur një ditë më parë në fshatin Çorrush të bashkisë Mallakastër, kishin ndërruar jetë katër ose pesë ditë më parë për shkaqe natyrale.
Sipas burimeve zyrtare nga Policia e Fierit, Sabri Velaj ka tentuar të heqë ose të veshë pantallonat, por ka humbur ekuilibrin dhe ka rënë në dysheme, duke goditur kokën dhe shkaktuar një hematomë. Dera e dhomës ku ndodhej ai ishte e mbyllur.
Ndërkohë, vëllai tjetër, Novruz Velaj, i paralizuar prej vitesh dhe që banonte në një dhomë tjetër, ka dëgjuar zhurmën dhe ka tentuar të hapë derën për të ndihmuar, por nuk ka mundur. Dyshohet se gjatë përpjekjes për të shpëtuar vëllain, ai ka humbur jetën gjithashtu.
Sipas Policisë, dy vëllezërit kanë ndërruar jetë në të njëjtën ditë, rreth pesë ditë më parë. Ata jetonin vetëm, mbështeteshin në pensionet e pleqërisë dhe nuk kishin të afërm.
