Situata e zjarreve në vend vijon të jetë kritike edhe ditën e sotme, ndërsa disa vatra të reja përbëjnë rrezik.
Në zonën e quajtur Gizë, në afërsi të fshatit Borizabë të Krujës, flakët janë përhapur me shpejtësi duke djegur shkurre e pemë frutore. Zjarri është favorizuar edhe nga era, ndërsa rrezikon një lagje me rreth 20 shtëpi. Për zjarrfikësen ka qenë e vështirë që të vendoset kontrolli, pasi janë 5 vatra aktive.
Po ashtu situata është e rëndë në Voskopojë, ku flakët kanë përfshirë pyjet me pisha në zonën midis Krushovës dhe Shipskës. Zjarri është prej disa orësh aktiv dhe pritet ndërhyrje me helikopter për të shuar flakët.
Edhe në fshatin Vadhizë të Fierit flakët kanë vijuar në drejtim të pyllit, ndërsa forcat e policisë dhe zjarrfikëses kanë ndërhyrë me mjete rrethanore për të shmangur rrezikun për banesat. Ndërhyrja po vazhdon për shuarjen e flakëve.
Kujtojmë që për rreth dy javë vendi jonë është përballur me zjarret, ashtu si edhe një pjesë e rajonit. Dy ditë më parë Bashkimi Europian dërgoi në Shqipëri tre helikopterë për shuarjen e flakëve, dy nga Holanda dhe një nga Çekia, por situata nuk është vënë ende nën kontroll, teksa vatra të reja zjarresh janë shfaqur në zona të ndryshme të vendit.
