Dhomat e Specializuara në Hagë kanë vendosur të vazhdojnë masën e paraburgimit për ish-presidentin e Kosovës, Hashim Thaçi, si dhe për Isni Kilajn, Bashkim Smakajn dhe Fadil Fazliun.
Vendimet janë marrë individualisht për secilin të pandehur, me arsyetim të detajuar nga gjykatësja e procedurës paraprake.
Në rastin e Hashim Thaçit, gjykata konstaton se ekziston ende rreziku i arratisjes dhe i ndikimit negativ në rrjedhën e procesit gjyqësor.
Në vendim theksohet se nuk ka asnjë provë të re që do të përjashtonte këto rreziqe.
Për Bashkim Smakajn dhe Isni Kilajn, gjykata vlerëson se propozimet e mbrojtjes për lirimin me kushte nuk janë të mjaftueshme për të garantuar sigurinë e procedurës dhe për të shmangur rrezikun e kryerjes së veprave të tjera penale.
Në rastin e Kilajt në veçanti, gjykatësja nënvizon se qëndrojnë të gjitha elementet që mbështesin mbajtjen në paraburgim, përfshirë mundësinë e arratisjes, ndërhyrjes në procesin gjyqësor dhe përsëritjes së veprave penale.
Ndërkohë, Hashim Thaçi, së bashku me Kadri Veselin, Jakup Krasniqin dhe Rexhep Selimin, po përballen me akuza të ngritura nga Zyra e Prokurorit të Specializuar për krime të pretenduara gjatë luftës në Kosovë, në periudhën 1998–1999.
Procesi ndaj tyre vijon në Hagë, ndërsa masa e paraburgimit mbetet aktive për të gjithë të pandehurit.
