“Wizz Air” vazhdon me të njëjtën “linjë” skandaloze shërbimesh ndaj qytetarëve, të cilët presin në ankth njoftime nëse do të udhëtojnë në destinacionin që kanë planifikuar të shkojnë.
Pas orësh pritje, ata janë njoftuar dje se tre fluturime të kësaj linje ajrore nga Tirana janë anuluar sërish.
Fluturimet që ishin parashikuar për në Milano Malpensa, Bologna, dhe Bari kanë krijuar shqetësim mes udhëtarëve.
“Tre aviona të anuluar në Rinas – Milano Malpensa, Bologna, Bari me Wizz Air dhe të gjithë pasagjerët lihen në mëshirën e fatit pa hotel, pa informacion të saktë. Çfarë bëhet kështu? Ju lutem ngrijeni si problem se po na bëjnë të dalim nga vetja!”, u shpreh qytetari.
Pasagjerët raportojnë se nuk kanë marrë asnjë informacion të qartë lidhur me arsyet e anulimit të fluturimeve apo kohën e mundshme të rinisjes.
Wizz Air ende nuk ka bërë një deklaratë zyrtare lidhur me këtë situatë, ndërsa pasagjerët mbeten në pritje të zgjidhjes së problemit të tyre.
