Në fshatin Nikaia të Mallakastrës, një varr i lashtë që daton 500 vjet para Krishtit qëndron i braktisur, pa asnjë ndërhyrje apo mirëmbajtje për më shumë se një dekadë. Banorët e zonës ngrejnë alarmin për rrezikun e shkatërrimit të këtij objekti me vlerë arkeologjike, ndërsa institucionet përgjegjëse vijojnë të qëndrojnë pasive.
Zbulimi i këtij varri ndodhi krejt rastësisht rreth dhjetë vjet më parë, pranë një banese në rrëzë të shkëmbinjve, kur Fuat Verbaj po kërkonte gurë për të mbushur bazën e shtëpisë që po përgatitej të shtrohej me çimento. Gjatë këtij procesi, ai zbuloi strukturën e varrit të ndërtuar në shekullin V para Krishtit.
Sipas të dhënave arkeologjike, Nikaia – që përputhet me vendndodhjen e fshatit Klos të sotëm – përbënte vendbanimin e parë të kësaj zone, përpara se zhvillimi të zhvendosej drejt Bylisit për shkak të mbipopullimit.
Safet Muhameti, banor i fshatit dhe ish-punonjës në ekspedita arkeologjike me profesorët Neritan Ceka dhe Skënder Muçaj, tregoi se menjëherë pas zbulimit kontaktoi një arkeolog nga Tirana. Ky i fundit e udhëzoi për pozicionin e varrit, përbërësit brenda tij dhe mënyrën e konservimit. Megjithatë, përtej interesimit fillestar, asnjë hap konkret nuk është hedhur për ruajtjen e këtij objekti. Në varr nuk janë gjetur eshtra apo objekte me vlerë, përveç disa fragmenteve të baltës së pjekur që mendohet t’u përkasin filxhanëve antikë.
Pavarësisht vizitave të disa arkeologëve gjatë viteve, mungesa e investimeve dhe neglizhenca institucionale e kanë lënë këtë varr të lashtë në mëshirë të kohës, i ekspozuar ndaj rrezikut të dëmtimit apo përvetësimit nga individë që kërkojnë të përfitojnë nga trashëgimia arkeologjike. Banorët apelojnë për ndërhyrje urgjente për të shpëtuar një pjesë të çmuar të historisë së zonës.
