Bashkimi Evropian duhet të fitojë kohë për të vlerësuar plotësisht implikimet e variantit të ri të koronavirusit Omicron dhe për t’u përgatitur, veçanërisht duke nxitur për norma më të larta të vaksinimit, tha presidentja e Komisionit Evropian të dielën.
I zbuluar fillimisht në Afrikën e Jugut, varianti tani është konfirmuar në vendet e BE-së, Belgjikë, Danimarkë, Gjermani, Itali dhe Holandë, po ashtu në Australi, Botsvana, Britani, Hong Kong dhe Izrael.
Ursula Von der Leyen, duke folur gjatë një vizite në Letoni, tha se e mori seriozisht variantin.
“Ne e dimë se jemi në një garë me kohën… Dhe shkencëtarëve dhe prodhuesve u duhen dy deri në tre javë për të pasur një pamje të plotë rreth cilësisë së mutacioneve të variantit Omicron”, tha ajo në një konferencë shtypi.
Ajo tha se koha duhet të shpenzohet duke u fokusuar në veprimet paraprake, veçanërisht duke rritur shkallën e vaksinimeve dhe të dozave përforcuese, duke reflektuar propozimin e Komisionit javën e kaluar që banorët e BE-së duhet të marrin doza shtesë.
Von der Leyen kujtoi se Komisioni, i cili kërkon të koordinojë reagimin e Bashkimit Evropian ndaj pandemisë, kishte lidhur në maj një kontratë të tretë me BionTech-Pfizer për deri në 1.8 miliardë doza vaksinash.
Kontrata, tha ajo, përfshinte një klauzolë që kompanitë do ta përshtatnin vaksinën e tyre brenda 100 ditëve nëse një variant shndërrohej në një “variant shqetësimi” që do të rezistonte ndaj vaksinave ekzistuese.
