Dy raste me simptomat e të ngjashme me variantin e ri Delta dyshohet se janë identifikuar në qarkun e Gjirokastrës. Një studente e ardhur nga jashtë vendit një ditë më parë, ka shfaqur simptoma të ngjashëm me atë të tipit indian të virusit Corona.
Ndërsa rasti i dytë është shënuar në Përmet te një 45-vjeçar, i cili kishte ardhur nga jashtë. Mësohet se të dyja rastet po trajtohen me regjim shtëpiak dhe deri tani gjendja e tyre shëndetësore është e stabilizuar, ndërkohë që pritet përgjigja e analizave nga Anglia.
Kujtojmë se disa ditë më parë ministrja e Shëndetësisë, Ogerta Manastirliu, deklaroi në Kuvend se deri më tani në vendin tonë nuk është regjistruar asnjë rast i varianti të ri të COVID-19, Delta. Ky fakt u bë i ditur gjatë fjalës së ministres në foltore.
“Por ka një alert, që është alerti për shkak të variantit të ri Delta, që është identifikuar në vendet e Rajonit. Nga OBSH vlerësohet si variant i ri që ka ngjallur shqetësim. Ndaj kërkohet një kujdes maksimal. Ne do të ndjekim rekomandimet e ekspertëve. Nga sot zgjatet ora policore deri ne orën 00:00″, u shpreh Manastirliu.
Sjellim në vëmendje gjithashtu se situata epidemiologjike në vendin tonë është e qëndrueshme në bazë të informacioneve zyrtare që publikon Ministria e Shëndetësisë. Ditën e djeshme fatmirësisht nuk ka pasur asnjë humbje jete, ndërsa është vërejtur një rritje e lehtë e numrit të rasteve të reja, ku në të gjithë territorin e vendit u regjistruan 7 raste pozitive me COVID-19.
