Kosova ka konfirmuar dy rastet e para me variantin Delta të Covid-19 që është zbuluar për herë të parë në Indi. Lajmin e ka bërë me dije Ministria e Shëndetësisë, e cila njofton se të dyja rastet kanë shfaqur simptoma, por tashmë janë shëruar dhe gjenden në shtëpi. IKSHKP ka gjurmuar të gjitha burimet dhe kontaktet e mundshme për të parandaluar përhapjen e mëtejshme të rasteve.
Varianti Delta është një mutacion i Covid-19 që sipas studimeve përhapet 40% deri në 60% më shpejt se variantet e tjera. Ky lloj virusi është gjithahstu më ngjitës se varianti Alpha i identifikuar në Kent të Anglisë.
Njoftimi i Ministrisë së Shëndetësisë:
Të nderuar qytetarë,
Sot kemi pranuar të dhënat nga 22 mostrat pozitive të dërguara në Institutin e Virologjisë të Klinikës Unversitare Charite në Berlin, prej të cilave janë identifikuar 2 (dy) mostra me variantin Delta (B.1.617.2) të SARS-CoV-2.
Të dy rastet kanë shfaqur simptoma, mirëpo tashmë janë shëruar dhe gjenden në shtëpi. Izolimi i tyre ka përfunduar. Ekipet e IKSHPK-së tashmë kanë gjurmuar të gjitha burimet dhe kontaktet e mundshme për të parandaluar përhapjen e mëtutjeshme të rasteve.
Varianti Delta u detektua për herë të parë në Indi në dhjetor të vitit 2020, i cili sot është njëri prej varianteve më brengosës në rruzullin tokësor. Hulumtimet e gjertanishme sugjerojnë se mund të jetë varianti që përhapet më së shpejti edhe më ngjitës sesa Alpha (U.K/B.1.1.7).
Masat parandaluese janë të njëjta. Individët të cilët rezultojnë pozitiv duhet të qëndrojnë në shtëpi për të parandaluar përhapjen në familje dhe në komunitet. Me zvogëlimin e kontakteve, do të mundësohet ndërprerja e përhapjes së infeksionit.
IKSHPK përsërit thirrjen për zbatimin e të gjitha masave të përgjithshme dhe specifike për mbrojtjen nga pandemia COVID-19 dhe zbatimin e masave të Qeverisë së Republikës së Kosovës.
Qytetarë të nderuar,
Ju lutemi për kujdes të shtuar!
Që të shmangni infeksionin:
Respektoni masat kufizuese për grumbullimet dhe tubimet publike!
Testohuni në rast se keni simptoma në QMF-të e lagjës.
Mbani maskën që mbulon hundën dhe gojën për të mbrojtur veten dhe të tjerët.
Shmangni turmat dhe hapësirat e brendshme të ajrosura dobët.
Respektoni distancën!
