Gjithë akuzat dhe provat e bëra publike ditën e djeshme ku e akuzonin për bashkëpunim me grupe kriminale Vangjush Dakon, duket se nuk kanë qenë “të vërteta”.
Kështu pretendon kreu i Bashkisë së Durrësit, i cili ka folur mbrëmjen e sotme dhe ka mohuar se ai mund të ketë drekuar me vëllezërit Avdylaj të cilët janë drejtuesit e një grupi kriminal.
Sipas tij, ai takohet me këdo që është votues potencial, pa i parë të shkuarën, por për të një gjë është e sigurt, që nuk ka favorizuar askënd.
“Unë nuk mbaj mend që ky personi të ketë qenë në këtë drekë. Unë kam qenë në drekë me 10-12 persona. Unë nuk mbaj mend të ketë qenë Altini. Por unë takimet drekat e darkat me grupe të ndryshme të interesit i kam të zakonshme. Kryetari ha dreka, darka pi kafe me të gjitha ata që e ftojnë.
Nëse dikush që ka precedent penalë është në këtë drekë nuk është faji im. Unë kam qenë thjeshtë një i ftuar në këtë drekë”, – tha Dako.
Më tej tha: “Unë personalisht nuk kam favorizuar askënd, as Avdylajt, nëse nuk përmbushin kriteret për diçka. Unë zhvilloj takime me të gjithë personat që i shoh si votues, pa parë as diplomën, as patentën dhe as nëse kanë apo jo precedentë penalë. Ka pasur auditime shpesh, por asnjëherë nuk kanë gjetur nëse unë kam favorizuar ndonjëherë këta persona”.
Mesa duket është fjala e Dakos e regjistruar, kundër fjalës së Dakos live, pasi mbrëmjen e djeshme “Zëri i Amerikës” ka publikuar përgjime në të cilat Vangjush Dako ishte duke drekuar me vëllezërit Avdylaj.
