Kryeministri Edi Rama ka inspektuar nga afër dy tendat në sheshin “Skënderbej”, ku po kryhet vaksinimi i të moshuarve me vaksinën Sinovac. Kreu i qeverisë, teksa ka bashkëbiseduar me të moshuarit, u ka uruar atyre shëndet, ndërsa nuk i ka kursyer as kritikat.
Ai i kërkoi ministres Manastirliu që të vendosnin disa karrige në hyrje të çadrave, ku të presin të moshuarit. Po ashtu, Rama u shpreh optimist per vaksinimin. “Brenda majit, do të kemi gjysmë milioni shqiptarë të vaksinuar”, tha fillimisht kryeministri. “Kam bindjen e plotë se do të ecim shumë shpejt. Kemi siguruar sasi të konsideruershme.
Besoj shumë që ky sezon turistik do të jetë shumë i lehtësuar si rezultat i këtyre goditjeve që i bëhet zinxhirit të infektimeve. Mbetemi të bindur që deri në pranverën e ardhshme do të jenë vaksinuar të gjithë. Por ministrja s’më lë, por unë mendoj se do të vaksinohen më parë”, përfundoi Rama.
Nga qeveria shqiptare është projektuar vaksinimi i plotë i popullatës brenda 14 muajve të ardhshëm, ndërsa plot 500 mijë vaksina, do të bëhen deri në muajin qershor. Sot, nisi vaksinimi masiv për grup-moshën mbi 70-vjeç, në sheshin “Skënderbej” në kryeqytet. Kryeminstri Rama premton se procesi i vaksinimit do të mbyllet para afatit 14 mujor, ndërsa kjo gjë, mbetet për t’u parë…
