Vaksinat e para anti COVID kanë mbërritur në aeroportin “Adem Jashari” të Prishtinës. Për të pritur 24 mijë dozat e AstraZeneca ka qenë i pranishëm edhe kryeministri Albin Kurti, i cili ka thënë se ky kontigjent i vogël do të ngjallë shpresë të madhe në shpëtimin e jetëve të njerëzve. Kurti ka thënë se bota ka më shumë se kurrë nevojë për solidaritet në përballje me këtë armik të përbashkët. Më tej ai tha se nuk ka kohë për të humbur dhe se procesi i vaksinimit duhet të fillojë menjëherë, pa asnjë vonesë.
”Jemi mbledhur këtu, për të mirëpritur arritjen e kontigjentit të parë të vaksinave në Kosovë. Është një kontigjent i vogël por që ngjallë shpresë të madhe, në vendin tonë për fillimin e shpëtimit të jetëve të njerëzve. Secila jetë në secilin vend të botës është e çmuar. Më shumë se kurrë bota ka nevojë për solideratitet për përballje me këtë armik të përbashkët për të gjithë njerëzimin. Askush në asnjë vend nuk është i sigurt derisa të gjithë të jemi të sigurt. Vendi ynë është i vogël dhe i varfër ndaj dhe ka nevojë për mbështetje të madhe dhe solidaritet nga të gjithë, e sidomos nga SHBA dhe BE që janë donatorët kryesorë të aleancës COVAX. Kohë që na ka kushtuar shumë e me shumë jetë njerëzish. Atë kohë s’mund ta kthejmë më prapa siç s’mund ta kthejmë ato jetë të humbura. Vaksinimi duhet të fillojë menjëherë dhe pa asnjë vonesë,“ka thënë Kurti.
