Komiteti Teknik i ekspertëve u mblodh ditën e sotme për të diskutuar mbi masat kufizuese dhe rritjen e rasteve të reja të infektimit me koronavirus. Vaksinimi masiv i popullatës vazhdon me ritme të shpejta ku dhe më parë u njoftua se dhe muaji shtator do të jetë muaji i hapur i vaksinimit.
Të pyetur nëse do të ketë penalitete për personat që refuzojnë të bëjnë vaksinën, Drejtoresha e ISHP, Albana Fico siguron se Shqipëria do të vijojë të mos e ketë vaksinimin me detyrim. Ajo thotë se këto strategji do të ndiqen, por problemi sipas saj qëndron tek mjekët dhe arsimtarët që përpos mbrojtjes së vetes kanë detyrë të mbrojnë edhe komunitetin.
“Vaksinimi nuk është i detyruar, e kemi ndjekur dhe do të vijojmë ta ndjekim. Referencat tuaja i kemi parë edhe ne, çështja qëndron, që ka disa element siç janë mjekët, arsimtarët, që përpos detyrën qytetare kanë detyrë të mbrojnë komunitetet.
Nuk detyrojmë, por ka mënyra alternative që një person të punojë, por të jetë brenda parametrave të punës. Nuk detyron njeri, por mund të kërkosh statusin joinfektiv të vetin. Për shkollat, ne ndjekim me shumë përgjegjësi, qoftë me vaksinim të hapur apo alternative. Ne shohim situatën dhe do të vijojmë”, u shpreh Fico.
