Kryeministri Edi Rama ka deklaruar në seancën e sotme parlamantare, se qeveria shqiptare e ka bërë pagesën paraprake “kaparin”, ndaj kompanisë COVAX, për vaksinën anti-Covid që pritet të dalë së shpejti.
Rama ka treguar se vendi ynë është tashmë pjesë e atyre shteteve që kanë bërë pagesën e detyrimit financiar ndaj Covax dhe do të përfitojë një numër vaksinash, të cilat do të jenë falas, fillimisht për shtresat më të prekura e më pas për pjesën e mbetur të popullsisë.
“Qeveria shqiptare, brenda afatit që skadon sot në mesnatë, ka paguar edhe kaparin për Covax, ka hyrë në listën e shteteve që kanë paguar financiarisht për vaksinën që pritet të dalë në vijim.
Kam patur edhe një sërë bisedash edhe me kancelarin para se të vija këtu, për të patur një qartësi, pasi vaksina do të dalë, por sasitë nuk do të jenë të menjëhershme për të mbuluar të gjithë popullsinë e Europës. Ne kemi një strategji që të fillojmë me vaksinimin falas të shtresave më të prekshme dhe më par të gjthë të tjerët”, u shpreh Rama.
Gjatë fjalës së tij në parlament, Rama i ka bërë thirrje të gjithë qytetarëve shqiptarë që të tregohen të vëmendshëm dhe të kujdesshëm ndaj mashtruesve dhe spekulantëve që shfrytëzojnë ankthin e personave të prekur me Covid për të përfituar, duke u ofruar atyre lloje të ndryshme ilaçesh që s’kanë asnjë efekt ndaj sëmundjes.
“Në këtë buxhet kemi vazhdimin e një mbështetjeje që hyn në fuqi në ditët në vijim për të gjithë të prekurit me Covid, në kushte shtëpie. Ky është një problem edhe në vendet e tjera shumë më të zhvilluara se ne, ku vërehet fenomeni i marrjes së medikamenteve që nuk ndihmojnë.
Mos bini pre e spekullantëve, ankthit të familjes, pasigurisë së vetë personit të prekur që nxitet të bëjë maksimumin që ato ilaçe bazë të recetës bazë që ka, nuk i mjaftojnë.
Në fakt është këmbëngulje e përditshme e ekspertëve, Komitetit Teknik që qytetarët të mos bien pre e ankthit dhe spekulantëve dhe të mos i marrin këshillat me Ëatsapp, nga mjekë që nuk janë të specializuar dhe autorizuar”, ka deklaruar Rama./GazetaReforma.com/
