Një ngjarje e rëndë ka tronditur Italinë, pasi një profesor i gjuhës gjermane postoi në rrjetet sociale një mesazh ku i uronte vajzës së kryeministres Giorgia Meloni të njëjtin fat tragjik si ai i Martina Carbonaro, një 14-vjeçare e vrarë nga ish-i dashuri në Afragola.
Postimi u përhap me shpejtësi, duke shkaktuar reagime të ashpra publike dhe politike.
Pasi përmbajtja u denoncua nga partia Fratelli d’Italia dhe u pasua nga një valë kritikash, profesori kërkoi ndjesë, duke e quajtur postimin një “shpërthim impulsiv” dhe një “gjest idiot”.
Ai theksoi se pavarësisht pendesës për fjalët e përdorura, që i konsideron të pajustifikueshme sidomos ndaj një fëmije, nuk tërhiqet nga bindjet e tij politike.
“Kjo qeveri nuk më përfaqëson,” u shpreh ai në një intervistë për Roma Online.
Sipas tij, postimi u shkrua në një moment tronditjeje emocionale, pasi kishte lexuar lajmin për dërgimin e armëve nga Italia drejt Izraelit. “Kur u zgjova, kuptova çfarë kisha bërë.
E fshiva menjëherë, jo nga frika, por sepse ishte gabim,” shtoi ai. Më tej, tha se ka marrë kërcënime me vdekje, fyerje dhe se persona të panjohur i kanë hedhur domate në banesë, duke e detyruar të paraqesë kallëzim në Policinë Postare.
Kryeministrja Giorgia Meloni reagoi me një deklaratë të fortë në Facebook, duke e cilësuar episodin si një shfaqje të urrejtjes së shfrenuar:
“Kjo nuk është politikë. Nuk është zemërim. Është një manifestim i errët i një urrejtjeje ideologjike të sëmurë, ku edhe jeta e një fëmije bëhet mjet për të goditur një kundërshtar.”
Meloni bëri thirrje për unitet ndaj gjuhës së urrejtjes dhe theksoi se ka kufij që nuk duhen kapërcyer, pavarësisht ndasive politike.
Nga ana institucionale, Ministri i Arsimit Giuseppe Valditara urdhëroi një hetim të menjëhershëm dhe paralajmëroi masa të rrepta disiplinore.
“Nuk do të ketë tolerancë ndaj dhunës në asnjë formë,” deklaroi ai.
