Kosova e përmbylli në mënyrën më të mirë procesin zgjedhor, pas incidente dhe pa akuza për vjedhje votash. Pjesëmarrja ishte e lartë dhe numërimi i votave deri tani ka shkuar më së miri me Vetëvendosjen që kryeson bindshëm.
Politikanët shqiptarë kanë dërguar urimet e para për partinë e Albin kurtit, teksa i radhës që ka reaguar ka qenë presidenti i Republikës, Ilir Meta.
Në një postim në rrjetet sociale ai ka uruar qytetarët e Kosovës dhe klasën politike për shembullin e demokracisë dhe votës së lirë. Meta ka thënë se Kosova hapi një faqe të re në integrimin e saj europian dhe uron që institucionet e reja të formohen përmes bashkëpunimit.
“Urime të gjithë qytetarëve dhe klasës politike të Kosovës për shembullin e shkëlqyer të besimit te demokracia dhe vota e lirë, si dhe për standardet e suksesshme të arritura në zgjedhjet e djeshme parlamentare.
E përshëndes pjesëmarrjen e lartë të qytetarëve në votime, të cilët sfiduan kushtet e vështira atmosferike dhe pandeminë COVID-19, për të marrë në dorë fatet dhe për të vendosur të ardhmen e tyre.
Kosova hapi një faqe të re në rrugëtimin e saj europian dhe konsolidimit të shtetit demokratik.
Urojmë, që institucionet e reja, që do të formohen përmes bashkëpunimit, të udhëheqin me sukses shtetin e Kosovës për të fituar sfidat e të ardhmes. 🇽🇰👏”, shkruan Meta.
