Ambasadorja amerikane Yuri Kim dhe ambasadori i Bashkimit Europian në Shqipëri, Luigi Sorcea kanë shprehur urimet e tyre pasi qeveria “Rama 3” nisi punë zyrtarisht.
Në një postim në Twitter, Sorcea shkruan se pret që integrimi në Bashkimin Evropian dhe reformat, përfshirë sundimin e ligjit, të zënë një vend të rëndësishëm në axhendë dhe kërkon koordinim të fortë institucional.
“Urojmë kryeministrin Rama dhe qeverinë shqiptare që mori detyrën. Presim që integrimi në Bashkimin Evropian dhe reformat, përfshirë sundimin e ligjit, të zënë një vend të rëndësishëm në axhendë. Koordimi i fortë ndër-institucional është kyç për pranimin në BE”, shkruan Soreca.
Gjithashtu në Twitter, Yuri Kim uron kryeministrin Edi Rama për nisjen zyrtare të mandatit të tretë historik. Kim thotë se SHBA mezi pret të punojë intensivisht me Shqipërinë për të forcuar demokracinë, mbrojtjen dhe biznesin.
Mesazhi i plotë i Kim:
Urime Kryeministrit Edi Rama në nisjen zyrtare të mandatit të tretë historik. SHBA mezi pret të punojë intensivisht me Shqipërinë për të forcuar demokracinë, mbrojtjen dhe biznesin. Urime dhe suksese!
Qeveria “Rama 3” nisi punën zyrtarisht ditën e sotme, pas betimit të kryeministrit dhe ministrave në Presidencë. Në përbërje të saj do të jenë 12 gra ministre dhe 5 burra, mes të cilëve kryeministri Rama.
