Kryebashkiaku Erion Veliaj dhe ministri Pandeli Majko, inspektuan urën e re pranë Pallatit me Shigjeta dhe e cilësuan ndërtimin e saj si një dhuratë për banorët e zonës. Veliaj u shpreh se lidhja e një hapsire nga NSHRAK-u deri te Pallati me Shigjeta me një urë këmbësore, është e jashtëzakonshme.
“Ka banorë që punojnë nga njëra anë e Lanës te tjetra, ka banorë që shkojnë në shkollë, që bëjnë pazarin apo kryejnë vizitat e tyre; ura lidh dy hotele të rëndësishme, një hotel ndërkombëtar me një hotel shqiptar, pra ka edhe turizëm, edhe biznes që zhvillohet në këtë zonë. Ndaj, më vjen mirë që, nga koha kur kërkesa është bërë për herë të parë në vitet 1998-2000, pothuajse pas 20 vitesh, kemi ndërtuar urën e tretë mbi Lanë. Filluam me urën tek ish ekspozita “Shqipëria Sot”, vazhduam me urën për makinat tek NSHRAK-u, dhe tani kemi një urë të tretë midis Pallatit me Shigjeta dhe NSHRAK-ut, vetëm për këmbësorët”, deklaroi Veliaj.
Duke shprehur besimin se sa herë shqiptarët mobilizohen bëhen gjëra të dobishme për qytetin, Erion Veliaj tha se e ardhmja e Tiranës varet nga bashkpunimi. Ai u kërkoi banorëve të kryeqytetit mbështetje për projektet publike.
“Thirrja ime për të gjithë qytetarët është: Na duhet bashkëpunimin, na duhet energji pozitive, inkurajim për çdo projekt publik. Ndaj, edhe jam i lumtur që edhe 100 metra më poshtë ku ka filluar projekti i Unazës, kemi një bashkëpunim total nga qytetarët, si nga tepelenasit, si nga tropojanët, si nga korçarët, si nga kuksianët. Fakti që të gjithë kemi kuptuar se pavarësisht se çfarë ka ndodhur në 20 apo 30 vitet e fundit, e ardhmja e Tiranës varet vetëm nga bashkëpunimi ynë, ky është një lajm shumë i mirë”, tha ai.
(BalkanWeb)
